ایس ای سی نے لوگوں کو پولنگ سٹیشن جا کر اپنے حقِ رائے دہی کا استعمال کرنے کی اپیل کی

0
147

جموں 27 نومبر :سٹیٹ الیکشن کمشنر کے کے شرما نے آج ایک پریس کانفرنس میں میڈیا کو ڈی ڈی سی انتخابات اور پنچائتی و بلدیاتی اداروں کے ضمنی انتخابات کو پُر امن طور منعقد کرنے کیلئے کئے گئے انتظامات کے بارے میں تفصیل دی ۔ ڈی ڈی سی انتخابات سے متعلق تفصیلات پیش کرتے ہوئے انہوں نے کہا کہ یو ٹی میں 280 حلقہ ہائے انتخاب ہیں جن میں سے 43 حلقہ ہائے انتخاب میں پہلے مرحلے میں صبح سات بجے سے دوپہر دو بجے تک ووٹ ڈالے جائیں گے ۔ انہوں نے مزید کہا کہ ڈی ڈی سی انتخابات مرحلہ اول کیلئے 296 امیدوار میدان میں ہیں جن میں سے 207 مرد اور 89 خواتین اُمیدوار شامل ہیں ۔ پنچائتی ضمنی انتخابات کا ذکر کرتے ہوئے کے کے شرما نے کہا کہ 94 حلقہ ہائے انتخاب کیلئے 279 امیدوار میدان میں ہیں جن میں 203 مرد ، 76 خواتین امیدوار پہلے مرحلے کے سرپنچ ضمنی انتخابات کیلئے میدان میں ہیں اسی طرح پنچ ضمنی انتخابات 368 حلقہ ہائے انتخاب منعقد کئے جا رہے ہیں اور 852 اُمیدوار جن میں 635 مرد اور 217 خواتین امیدوار شامل ہیں پنچوں کے لئے انتخابات لڑ رہے ہیں ۔ انہوں نے مزید کہا کہ 768 پنچ اور 36 سرپنچ بلا مقابلہ منتخب کئے گئے ہیں ۔ کے کے شرما نے مزید کہا کہ جموں کشمیر میں 67 لاکھ ووٹران رائے دہی کے اہل ہیں جن میں سے 7 لاکھ رائے دہندگان پہلے مرحلے میں اپنے ووٹ کا استعمال کریں گے ۔ جن کیلئے پولنگ سٹیشن پہلے ہی قائم کئے گئے ہیں ۔ انہوں نے مزید کہا کہ پولنگ سٹیشنوں میں انتخابات سے متعلق تمام انتظامات مکمل کئے گئے ہیں ۔انہوں نے کہا کہ کووڈ 19 وباء سے متعلق احتیاطی تدابیر پر سختی سے عمل درآمد ہو گا اور ہر پولنگ سٹیشن میں سینی ٹائیزر ، تھرما میٹر ، ماسک وغیرہ رائے دہندگان اور انتخابی عملے کیلئے بہم رکھے گئے ہیں ۔