14

مشیر بصیر خان نے امرناتھ یاتراکی تیاریوں اورترقیاتی سرگرمیوںکاجائزہ لیا

گاندر بل 14 اپریل :لفٹینٹ گورنر کے مشیر بصیر احمد خان نے آج گاندر بل کا دورہ کیا جہاں کانفرنس ہال منی سیکرٹریٹ گاندر بل میں متعدد وفود نے اپنے علاقوں سے متعلق انہیں درپیش مختلف معاملات اور شکایات سے آگاہ کیا ۔ اس سے قبل انہوں نے ڈپٹی کمشنر گاندر بل اور ایس ایس پی گاندر بل کے ساتھ ایک میٹنگ منعقد کی جس میں شری امر ناتھ جی یاترا کیلئے کی گئی تیاریوں کا جائیزہ لیا ۔ مشیر نے ڈپٹی کمشنر کو ہموار اور کامیاب یاترا کیلئے درکار تمام اقدامات اٹھانے کیلئے کہا تا کہ یاتریوں کو تمام بنیادی سہولیات فراہم کی جا سکیں ۔ مشیر نے کہا کہ رمضان کے مقدس مہینے کے دوران انتظامیہ کو کسی بھی منافع بخش شخص سے چوکنا رہنا چاہئیے اور بازار کی باقاعدہ چیکنگ کی جانی چاہئیے ۔ اس مقدس مہینے کے دوران لوگوں کو ہر محاذ پر خصوصاً تراوی اور سحری کے اوقات میں تمام سہولیات بہم رکھی جانی چاہئیں ۔ منی سیکرٹریٹ میں منعقدہ عوامی ملاقات پروگرام کے دوران ضلع گاندر بل کے مختلف شعبہ ہائے زندگی سے تعلق رکھنے والے 15 سے زائد وفود جن میں ڈسٹرکٹ ڈیولپمنٹ کونسل ، یو ایل بی ، بی ڈی سی ، ڈسٹرکٹ ٹریڈر ایسوسی ایشن گاندر بل ، ٹرانسپورٹرز ، فروٹ گروورز ، سرپنچ ایسوسی ایشن گاندر بل ، پٹھو /پونی والا ایسوسی ایشن کنگن ، شیعہ ویلفئیر فرنٹ گاندر بل کے وفد شامل تھے ، نے مشیر سے ملاقات کی ۔ اس دوران وفود نے انہیں درپیش مسائل اور مشکلات سے آگاہ کیا اور ان کے بروقت ازالے کو یقینی بنانے کیلئے ان کی ذاتی مداخلت طلب کی ۔ مشیر نے تمام مطالبات کو غور سے سُنا اور یقین دلایا کہ جائیز مسائل کو بروقت حل کیا جائے گا ۔ انہوں نے کہا کہ لفٹینٹ گورنر خاص طور پر عوامی شکایات کے طریقہ کار کی ذاتی نگرانی کر رہے ہیں اور جائیز مسائل کو کم از کم وقت میں حل کرنے کے خواہاں ہیں ۔ مشیر موصوف نے ضلع انتظامیہ پر زور دیا کہ وہ ذمہ داری سے عوام کی توقعات پر پورا اُتر نے کیلئے ہر محاذ پر ضلع کی ترقی کے سلسلے میں گہری دلچسپی لیں ۔ دریں اثنا مشیر نے تمام وفود پر زور دیا کہ وہ ضلع میں عوام کو کووڈ 19 کے رہنما خطوط پر سختی سے عمل پیرا رہنے کیلئے بیدار کریں ۔ ڈسٹرکٹ ڈیولپمنٹ کونسل کی چئیر پرسن نزہت اشفاق ، ڈپٹی کمشنر گاندر بل کریتکا جیوتسنا ، وائس چئیر پرسن ، ڈائریکٹر رورل ڈیولپمنٹ کشمیر قاضی سرور ، ڈائریکٹر ٹورازم کشمیر ڈاکٹر جی این ایتو ، ڈائریکٹر فلوریکلچر کشمیر فاروق احمد راتھر ، ایس ایس پی گاندر بل سہیل منور میر ، ایڈیشنل ڈپٹی کمشنر گاندر بل فاروق احمد بابا ، چیف انجینئر کے پی ڈی سی ایل ، ایس ڈی ایم کنگن کے علاوہ دیگر ضلع اور سیکٹورل افسران اس موقعہ پر موجود تھے ۔

اس خبر پر اپنی رائے کا اظہار کریں

اپنا تبصرہ بھیجیں